അൺ റിസർവ്ഡ് ടിക്കറ്റുകൾക്ക് പുതിയ കൗണ്ടറുകൾ തയാറാക്കി കോഴിക്കോട് റെയിൽവേ സ്റ്റേഷൻ

കോഴിക്കോട് : കോഴിക്കോട് റെയിൽവേ സ്റ്റേഷനിൽ അൺ റിസർവ്ഡ് ടിക്കറ്റുകൾക്ക് പുതിയ കൗണ്ടറുകൾ തയാറാക്കി. നവീകരണ പ്രവൃത്തികൾ നടത്താൻ വേണ്ടി ഒന്നാം പ്ലാറ്റ്ഫോമിലെ കെട്ടിടങ്ങൾ പൊളിച്ചുതുടങ്ങിയതോടെ പഴയ കെട്ടിടത്തിൽ പ്രവർത്തിച്ചിരുന്ന അൺ റിസർവ്ഡ് ടിക്കറ്റ് കൗണ്ടറുകൾക്കു പകരം ഒന്നാം പ്ലാറ്റ്ഫോമിലെ തെക്കുഭാഗത്തെ നടപ്പാതയുടെ സമീപത്തായി തയാറാക്കിയ താൽക്കാലിക കൗണ്ടറുകളാണ് ഇന്നലെ രാത്രി മുതൽ തുറന്നു പ്രവർത്തിക്കുന്നത്. ജനറൽ വിഭാഗത്തിന് രണ്ട് എണ്ണവും ഭിന്നശേഷിക്കാർക്കായി ഒരെണ്ണവും അടക്കം മൂന്ന് കൗണ്ടറുകളാണ് നിലവിൽ സജ്ജീകരിച്ചിരിക്കുന്നത്.   പക്ഷേ, ഒരെണ്ണം മാത്രമേ സദാസമയവും പ്രവർത്തിക്കൂ. ഇതിനൊപ്പം 3 ഓട്ടമാറ്റിക് ടിക്കറ്റ് വെൻഡിങ് മെഷീനുകൾ (എടിവിഎം) ഈ പരിസരത്ത് ടിക്കറ്റ് വിതരണത്തിനു പ്രവർത്തിക്കും.

ഇതോടൊപ്പം സ്റ്റേഷനിലേക്കു പ്രവേശിക്കാൻ എടിഎം കൗണ്ടർ കെട്ടിടത്തിനു മുന്നിലൂടെ പുതിയ വഴിയും ഇന്നലെ തുറന്നു. സ്റ്റേഷനു മുന്നിലെ റോഡിൽനിന്ന് എടിഎം കൗണ്ടർ കെട്ടിടത്തിനരിലൂടെ തുറന്ന പുതിയ വഴിയിലൂടെ പ്രവേശിച്ചാൽ ഈ പുതിയ ഗേറ്റിന് അടുത്തെത്താം. ഒന്നാം പ്ലാറ്റ്ഫോമിനു പുറത്തുനിന്ന് 2 വഴികളിലൂടെ മാത്രമായിരിക്കും ഇനി സ്റ്റേഷനിലേക്കു പ്രവേശനം. എസ്കലേറ്ററിന് അടുത്തു നേരത്തെയുള്ള കവാടത്തിനു പുറമെ ഇന്നലെ എടിഎം കൗണ്ടർ കെട്ടിടത്തിനടുത്തു തുറന്ന പുതിയ വഴിയുമാണിവ. മറ്റെല്ലാ വഴികളും അടച്ചു.