കോഴിക്കോട് പാലാഴിക്ക് സമീപം ഫ്ലാറ്റിൽനിന്ന് വീണ് ഏഴുവയസുകാരന് ദാരുണാന്ത്യം

പന്തീരാങ്കാവ് : ഫ്ലാറ്റിൽനിന്ന് വീണ് ഏഴുവയസുകാരന് ദാരുണാന്ത്യം. കോഴിക്കോട് പാലാഴിക്ക് സമീപം ഇരിങ്ങല്ലൂർ ലാൻ്റ് മാർക്ക് 'അബാക്കസ് ' ബിൽഡിങിലെ ഏഴാം നിലയിൽ നിന്ന് വീണ നല്ലളം കീഴ് വനപാടം എം.പി ഹൗസിൽ മുഹമ്മദ് ഹാജിഷ്-ആയിശ ദമ്പതികളുടെ മകൻ ഇവാൻ ഹൈബലാണ് ഇന്നലെ രാത്രി ഒമ്പതോടെ അപകടത്തിൽപെട്ടത്. കളിക്കുന്നതിനിടെ ബാൽക്കണിയിൽ കയറിയ കുട്ടി ഏഴാം നിലയിൽ നിന്ന് താഴേക്ക് വീഴുകയായിരുന്നു. ശബ്ദം കേട്ട് ഓടി എത്തിയ സെക്യൂരിറ്റി ജീവനക്കാരും മറ്റുള്ളവരും ചേർന്ന് കുട്ടിയെ തൊട്ടടുത്ത സ്വകാര്യ ആശുപത്രിയിലും ശേഷം കോഴിക്കോട് മെഡിക്കൽ കോളജിലും എത്തിച്ചെങ്കിലും ജീവൻ രക്ഷിക്കാനായില്ല. ചിന്മയ സ്കൂൾ രണ്ടാം ക്ലാസ് വിദ്യാർഥിയാണ്. ഒരു സഹോദരിയുണ്ട്.