തിക്കോടിയിൽ കടലിൽ കുളിക്കുന്നതിനിടെ തിരയിൽപ്പെട്ട് നാലുപേർ മരിച്ചു

കൊയിലാണ്ടി: പയ്യോളിയിൽ തിക്കോടി ഡ്രൈവിംഗ് ബീച്ചിൽ കടലിൽ കുളിക്കാനിറങ്ങിയ നാലുപേർ തിരയിൽപ്പെട്ട് മരിച്ചു. വയനാട്ടിൽ നിന്ന് വിനോദസഞ്ചാരത്തിനെത്തിയ സംഘത്തിലെ നാലുപേരാണ് മരിച്ചത്. കൽപ്പറ്റ സ്വദേശികളായ അനീസ, വിനീഷ്, വാണി, ഫൈസൽ എന്നിവരാണ് മരിച്ചത്. ഒരാളെ രക്ഷപ്പെടുത്തി ആശുപത്രിയിൽ പ്രവേശിപ്പിച്ചു.

ഇന്ന് വൈകീട്ട് അഞ്ചുമണിയോടെയാണ് സംഭവം. കൽപ്പറ്റയിൽ നിന്നെത്തിയ 26 അംഗ സംഘത്തിലെ നാലുപേരാണ് മരിച്ചത്. അഞ്ചുപേരാണ് കടലിൽ ഇറങ്ങിയത്. തിരയിൽ അകപ്പെട്ട മൂന്ന് പേരെ അഗ്‌നിശമന സേനയും നാട്ടുകാരും ചേർന്ന് ആശുപത്രിയിൽ എത്തിച്ചെങ്കിലും രക്ഷിക്കാൻ സാധിച്ചില്ല. കടലിൽ തിരച്ചിലിനിടെ ഫൈസലിനെയാണ് അവസാനം കണ്ടെത്തിയത്. ജിമ്മിൽ ഒരുമിച്ച് വർക്ക്ഔട്ട് ചെയ്യുന്നവരാണ് അപകടത്തിൽപ്പെട്ടത്.