ബിപിഎൽ വിഭാഗക്കാർക്ക് സൗജന്യ ശുദ്ധജലം; അപേക്ഷ ജനുവരി 31 വരെ

തിരുവനന്തപുരം ∙ ബിപിഎൽ വിഭാഗക്കാർക്ക് ജല അതോറിറ്റി നൽകുന്ന സൗജന്യ ശുദ്ധജല ആനുകൂല്യം ലഭിക്കുന്നതിനുള്ള അപേക്ഷകൾ ജനുവരി 31 വരെ സമർപ്പിക്കാം.

പ്രതിമാസം 15 കിലോലീറ്റർ (15,000 ലിറ്റർ) വരെ മാത്രം ജല ഉപഭോഗമുള്ള ബിപിഎൽ വിഭാഗത്തിൽപ്പെടുന്നവർക്കാണ് ആനുകൂല്യം ലഭിക്കുക. വാട്ടർ ചാർജ് കുടിശികയുള്ളവരും പ്രവർത്തനരഹിതമായ മീറ്റർ ഉള്ളവരും കുടിശിക അടച്ചുതീർക്കുകയും കേടായ മീറ്റർ മാറ്റി സ്ഥാപിക്കുകയും ചെയ്താൽ മാത്രമേ അപേക്ഷ പരിഗണിക്കുകയുള്ളൂ.

ഈ വർഷം മുതൽ വാടകവീടുകളിൽ താമസിക്കുന്നവർക്കും ബിപിഎൽ ആനുകൂല്യം ലഭ്യമാകും. ഇതിനായി വാടകക്കരാറിന്റെ പകർപ്പും വീടുടമസ്ഥന്റെ സമ്മതപത്രവും അപേക്ഷയോടൊപ്പം സമർപ്പിക്കണം.

ആനുകൂല്യം ലഭിച്ചുകൊണ്ടിരിക്കുന്നവരും പുതുതായി അപേക്ഷിക്കുന്നവരും 2026 ജനുവരി 31നു മുൻപ് ഓൺലൈൻ പോർട്ടൽ വഴി അപേക്ഷ നൽകണം.

വിവരങ്ങൾക്ക് ടോൾഫ്രീ നമ്പർ 1916-ൽ ബന്ധപ്പെടാവുന്നതാണ്.