നന്മണ്ട: നന്മണ്ടയിൽ ഹോട്ടലിൽ ആക്രമണം. ഊണിനൊപ്പം മീൻ കിട്ടിയില്ലെന്ന് പറഞ്ഞ് ആണ് ഹോട്ടലിൽ ആക്രമണം നടത്തിയത്. ശനിയാഴ്ച ഉച്ചയോടെ നന്മണ്ട പതിനാലിലെ ഹോട്ടലിലാണ് സംഭവം. ഊണിനൊപ്പം അയക്കൂറ മീന്‍ കിട്ടാത്തതിനാണ് ഹോട്ടലില്‍ ആക്രമണം നടത്തിയത്. പ്രകോപിതരായ സംഘം ഹോട്ടലിലെ മേശകളും കസേരകളും അടിച്ചുതകര്‍ത്തു. കൂടാതെ ജീവനക്കാരെയും മര്‍ദ്ദിച്ചു.
പിറന്നാളാഘോഷത്തിന്റെ ഭാഗമായി ശനിയാഴ്ച ഉച്ചയ്ക്ക് ഹോട്ടലില്‍ 40 പേര്‍ക്ക് ഭക്ഷണം ഏര്‍പ്പാടാക്കിയിരുന്നു. ചിക്കന്‍ ബിരിയാണി, ബീഫ് ബിരിയാണി, മീന്‍കറിയടക്കമുള്ള ഊണ് തുടങ്ങിയവയായിരുന്നു വിഭവങ്ങള്‍. തുടര്‍ന്ന് ആദ്യം 20 പേരുടെ സംഘം ഹോട്ടലിലെത്തി ഭക്ഷണം കഴിച്ച് മടങ്ങി.
ഇതിനുശേഷം ബാക്കിയുള്ളവരും ഹോട്ടലിലെത്തി. ഇവരില്‍ ചിലരാണ് ഹോട്ടല്‍ ജീവനക്കാരോട് അയക്കൂറ മീൻ ആവശ്യപ്പെട്ടത്. അയക്കൂറ ഇല്ലെന്നും അയല മതിയോ എന്നും ജീവനക്കാര്‍ ചോദിച്ചു. ഇതോടെയാണ് അയക്കൂറ കിട്ടാത്തതിനാല്‍ സംഘം പ്രകോപിതരായത്.
തുടര്‍ന്ന് ഇവര്‍ ബഹളം വെയ്ക്കുകയും ഹോട്ടലിലെ മേശകളും കസേരകളും അടിച്ചു തകര്‍ക്കുകയുമായിരുന്നു. സംഘര്‍ഷമുണ്ടാക്കിയ സംഘം ഹോട്ടല്‍ ജീവനക്കാരെ മര്‍ദ്ദിച്ചതായും പരാതിയുണ്ട്.
പരിക്കേറ്റ അഞ്ചു ജീവനക്കാരെ പിന്നീട് ആശുപത്രിയില്‍ പ്രവേശിപ്പിച്ചു. ഹോട്ടൽ ഉടമയുടെ പരാതിയിൽ നാലു പേരെ ബാലുശ്ശേരി പോലീസ് കസ്റ്റഡിയിലെടുത്തിട്ടുണ്ട്.
0 Comments