കാന്തപുരം: ജി. എൽ. പി. സ്കൂൾ കാന്തപുരത്ത് വിപുലമായ പരിപാടികളോടെ ഓണാഘോഷം ‘കാന്തപുരത്തോണം’ സംഘടിപ്പിച്ചു. ആഘോഷപരിപാടികളുടെ ഉദ്ഘാടനം പഞ്ചായത്ത് പ്രസിഡന്റ് നിർവഹിച്ചു. സ്കൂൾ ഹെഡ്മിസ്ട്രസ് സ്വാഗതം ആശംസിച്ചു. മുൻ ഹെഡ്മിസ്ട്രസ് ആശംസകൾ നേർന്ന് സംസാരിച്ചു. പി. ടി. എ. പ്രസിഡന്റ് പരിപാടികൾക്ക് നേതൃത്വം നൽകി.
വിദ്യാർത്ഥികളും അധ്യാപകരും ചേർന്ന് ഒരുക്കിയ മനോഹരമായ സ്നേഹപ്പൂക്കളത്തോടെയാണ് ആഘോഷങ്ങൾക്ക് തുടക്കമായത്. തുടർന്ന് വിദ്യാർത്ഥികളും അധ്യാപകരും അവതരിപ്പിച്ച തിരുവാതിരക്കളിയും വിവിധ നൃത്തപരിപാടികളും അരങ്ങേറി.
കുട്ടികൾക്കും അധ്യാപകർക്കും എം. പി. ടി. എ. അംഗങ്ങൾക്കുമായി വിവിധ ഓണക്കളികളും മത്സരങ്ങളും സംഘടിപ്പിച്ചു. വിദ്യാർത്ഥികൾ വീടുകളിൽ നിന്ന് തയ്യാറാക്കി കൊണ്ടുവന്ന വിഭവങ്ങൾ ഉൾപ്പെടുത്തി വിപുലമായ ഓണസദ്യയും ഒരുക്കിയിരുന്നു.
കാന്തപുരത്തെ നാട്ടുകാരുടെയും രക്ഷിതാക്കളുടെയും സജീവ പങ്കാളിത്തവും സഹകരണവും ആഘോഷത്തിന് കൂടുതൽ നിറം പകർന്നു. കൂട്ടായ്മയുടെയും സൗഹൃദത്തിന്റെയും സന്ദേശമുയർത്തിയ ‘കാന്തപുരത്തോണം’ എല്ലാവർക്കും വേറിട്ടൊരു ഓണാനുഭവമായി മാറി.
0 Comments